طبعاً مش محتاجة اشرح او افسر حالتي النفسية عاملة ازاي
ازاي؟ في ايه ما الموضوع واضح اهو.. مش واضح؟ ازاي ده انا حاطه الصورة السوداء حتي
يا جماعة الصورة السوداااااء، ازاي مش عارفينها! الصورة اللي اي واحدة مفركشة بتحطها، ايوه هي دي، ايوه برده لو حد مات له ميت بيحطها.
ايوه و لو حد سأل "فيه ايه؟" لازم يكون الرد "مفيش، مش قادر أحكي" عشان تبان الضيقة و الزعل. بس سؤال جوهري و لما انت مش قادر تحكي قارفنا و قالب معدتنا ليه؟
خلاص حطيت الصورة السوداء؟ ارتحت؟ بينت مشاعرك عن طريقها؟ حاجة اتغيرت؟ المصيبة اتبدلت بحاجة تفرحك؟ اللي ماتلك رجع يعيش؟
طيب ليه؟ ليه ترخص مشاعرك؟ ليه مشاعرك تبقي رخيصة لدرجة انك عشان تعبرعنها بتحط صورة سوداء علي موقع علي
الانترنت اسمه "فيس بوك" الناس بتستخدمه للترفيه.. دي حاجة في منتهي الرخص
محتاج ناس تواسيك و تطبطب عليك؟ ولقيتهم؟ طيب هل خففوا عنك؟ قدمولك أي مساعدة؟
ده أساساً في ناس بتعمل لايك علي الصورة و مش بيبقي مفهوم لايك علي ايه بالظبط، يمكن ده بيبقي نوع من أنواع المشاركة في نظرهم؟ جايز
طيب و تفتكر ان لو ماتلك ميت ده حيفيده في تربته او حيقلل من زعلك عليه؟ ولا الدموع.
متقللش من مشاعرك، متخليش الناس الغلط هي اللي تشاركك، متعبرش عن مشاعرك غلط، و متستهلكش مشاعرك في حاجات غلط، مش أي حاجة تزعلك تعيط عليها، و متفرحش من أقل حاجة، لازم تبقي الحاجة من القلب و مع الناس الصح، عشان تبقي مميزة، ومتبقاش تعود.
حلوة..
ReplyDelete