لاحظت في الآونة الأخيرة اعتراض الشباب علي الجواز و اعتباره علي حد قولهم "نظام اجتماعي فاشل" في حين انه أنجح علاقة خلقها ربنا .. و بسؤالهم عن السبب كانت أول جملة بتتقال هي "عشان أعيش حياتي" بس هو مين اللي قال ان الجواز هو نهاية الحياة؟ الجواز ده بداية لحياة جديدة مليئة بالحب و العشق و الدلع و علشان احنا مع بعضينا و لأول مرة لوحدينا و كده
أحب أوضح النقطة الوحيدة الفاصلة في الموضوع ده .. ألا و هي ان الزواج الناجح متوقف علي حاجة. واحدة. بس. مفيش غيرها: الزواج بــــــــــمرأة مصـــــــــــــريـــــــــــــــة و زي ما بيقول المثل: اتجوزت مصرية؟ لأ .. يبقي متجوزتش.
عزيزي قارئ هذا المقال، أحب أوضحلك أهم عشر مميزات للزواج بمرأة مصرية أصيلة، اه والله أصيلة
:فعلي سبيل الذكر لا الحصر
الميزة الأولي
تمتاز المرأة المصرية بالوش المريح المبتسم علي طول، اللي هو تصحي الصبح علي وشها السمح ده و تبتدي تباشر يومك اللي غالباً بيكون انتهي من اللحظة دي.
الميزة الثانية
المرأة المصرية تمتاز بالهدوء و الصوت الناعم الجذاب، عمر ما صوتها يعلي في أي مشادة كلامية بينك و بينها بالعكس دي بتلتزم الصمت، و أكبر دليل علي كده، انها بتنهي كلامها ب "خليني ساكتة أحسن" .. ها؟ بتلتزم الصمت ولا مبتلتزمش؟
الميزة الثالثة
سألوا زمان دكتور دايت اغريقي "ما هو الجسم المثالي؟ قال اسألوا المرأة المصرية" مقالش الفرنساوية مقالش الروسية. قال اسألوا ميــــــــن؟ المصـــــرية يا ولاد.
و يرجع السبب لكون المصرية نازلة بتركيبة جسم مختلفة، و الدلـــــــيل انك لو سألتها مثلاً عندك كرش؟ حتقولك كرش؟
يعني ايه كرش أساساً؟ مانعرفوش ماشُفناهوش مقابلناهوش .. كلنا نازلين زي ما بقولك كده من غير كروش ولا أي شحوم أو لحوم.
الميزة الرابعة
المرأة المصرية بتكره اللت و العجن .. المرأة المصرية لا تحكي في المحكي .. دايماً عندها مواضيع جديدة و متنوعة لأ و كمان شيقة
تحب تسمعها كده و حيعجبك اختيارها للمواضيع اللي في غايــــــة الروعة و أهم ميزة أنها لو حست انك بس بــــــــــس مش قادر تسمع .. حتسكت علي طول .. حتكمل كلام؟ مين قال كده؟ .. حتمسك قرقوشة ودنك و تزن جواها؟ ده كلام يتصدق بردو.
الميزة الخامسة
لو سألت المرأة المصرية "مالِك؟" حتجاوب عليك بمنتهي الســـــــرعة و الوضــــــــوح و الصراحــــــة و حتقولك "مضايقة من "كذا، كذا، كذا" .. لا حتقولك "مفيش" و العياذ بالله و لا "اعرف انت" ولا "شوف انت" و لا الكلام الفارغ ده
المرأة المصرية لا تلف .. لا تدور.
الميزة السادسة
ترتاد المرأة المصرية دائماً صالونات التجميل و الكوافيرات و الذي منه عشان تظهر في أحسن حال و صورة قدامك و مش مجرد أول سنة جواز .. لأ حتي بعد ما تبلغ أرزل العمر حتفضل مهتمة بمظهرها
الميزة السابعة
تعتمد المرأة المصرية اعتماد كلي في اتخاذ قرارتها علي ما يقوله لها عقلها و علي المنطق .. فهي لا تستعين لا بآراء سوسن ولا عفاف .. ولا تشرك أحد في حياتها الزوجية .. انما هي تحافظ علي خصوصية هذه العلاقة و علي أسرارك بالتبعية.
الميزة الثامنة
أول لما تتجوز مرأة مصرية و تدخلها ما بين أهلك .. حتلاقيها انسجمت معاهم و بتحاول توطد العلاقات بينها و بينهم و بالذات ٣ أشخاص: أمك, أختك و سلفتها
و حتلاقيها كمان بتستني زيارة أهلك من الاسبوع للاسبوع .. و عمرها عمــــــرهـــــــا ما تتخانق معاك يوم الزيارة الصبح لا تفهم انها بتتلكك لا سمح الله عشان متروحش لأهلك و العياذ بالله.
الميزة التاسعة
يوجد أقاويل و مزاعم ان المرأة المصرية "نكدية" و ده بلا شك افتراء و كذب بين .. فهي كائن بطبعه يبث الفرحة و السعادة تتناقش في أي موضوع بشكل موضوعي بحت و تستند علي المنطق و العقلانية .. و بمجرد انتهاء أي موضوع أو جدال ما بينكوا بتقفله تماماً طول مدة زواجكم .. و عمرها ما تجيب سيرة أي. موضوع. قديم.
الميزة العاشرة
علي عكس اشتهار مصر بالدراما بتاعتها .. فالمرأة المصرية لا تتصف بالدراما ولا "بالأفورة" ولا بالتهويل بالتبعية .. انما هي بتدي كل موقف علي قد اللي بيستحقه بالضبط .. متجريش بقي تعيط و لا تصوت و لا بتهول المواضيع اطلاقاً
ده أنا سمعت عن بعض الزوجات الغير مصريات بيعملوا حاجة غريبة جداً .. ممكن يحصلها موقف مش لطيف مع احدي صديقاتها بس تتخانق مع زوجها و ممكن كمان تحمله مسؤولية اللي حصل .. لأ دي كمان ممكن تقعد ٣ أيام مكتئبة في البيت .. و ده موقف مبيحصلش في البيت اللي فيه زوجة مصرية.
يا بخته .. يا سعده يا هناه اللي يظفر و يفوز بزوجة مصرية .. طبعاً مش كل المصريات فيهم المزايا دي .. فممكن تقل ميزة تزيد ميزة .. بس خلينا متفقين ان الغالبية العظمي من المصريات بيتمتعوا بكل المزايا الجميلة دي.
يا رب اديني ثواب و صحة و مال و عيال علي قد صدقي و أمانتي في توصيل حقائق كانت غايبة عن الشباب. اللهم بلغت اللهم فاشهد.
